“Талай жылдар тағылымы толысып, еңбектен соң зейнет келіп жеткен күн”

М.Әуезов атындағы орта мектебінде 2024 жылдың 23 ақпан күні бастауыш сынып бірлестігінің ұйымдастыруымен “Талай жылдар тағылымы толысып, еңбектен соң зейнет келіп жеткен күн” тақырыбында мектебімізге еңбегін сіңірген бастауыш сынып мұғалімі,құрметті ұстаз, қадірлі де асыл ана, бүгінде зейнеткерлік жасқа жетіп

отырған Нұрманова Күлзипа Жалелқызының  дара жолына арналған кеші болып өтті. 

Адам-өз өмірінің сәулетшісі. Даралар да, қаралар да, даналар да қонақ болып өтетін мына дүниеде әркім өз өмір соқпағын өзі сомдайды.Оның мәнді де сәнді,мағыналы да мазмұнды болуы сол өмір иесінің қарымы мен қасиетіне байланысты.Құдіретті табиғат адами қасиеттерін мол дарытқан  апайымыздың ғұмырнамасының айшықты ғибраты соның айқын белгісі.

Сол жылдар аралығында алдынан талай түлектер оқып білім алды. Еліміздің түкпір-түкпірінде сан алуан маман иелері атанып, абыройлы қызмет жасап жүргендері қаншама.

Күлзипа Жалелқызының   мерейлі мерей тойына ортақтаса, қуанышты сәтінің куәсі болып туған – туыс ағайындары,сонымен қатар ардагер бастауыш сынып мұғалімдері, әріптес ұстаздары және түлектері жиналып, жүрек жарды ақ тілектерін ақтарды.  

Ұстаз мерейі беделмен өлшенеді. Ал беделдің өлшемі қашан да биік екені рас.

Адамгершілігі, иманы мол, жүзі райлы, білімді, мейірімді де есті адамдардың шоқтығы ерекше болмақ.  Осындай ұстаздың бірі – Күлзипа Жалелқызы.

Еткен еңбектің еленгені кімге де болса қуаныш, көңілге үлкен медет! Мерейлі мерекеңіз құтты болсын! Отбасыңызға амандық, деніңізге саулық,  ендігі зейнеткерлік өміріңіз мәнді мағыналы болсын.