Шәкірттердің сезінумен арманын, 40 жылды ұстаздыққа арнадың

Ұстаз… Қандай қасиетті сөз?! Әр адамның жүрегіне ерекше жылулық нұрын себетін аяулы тұлға. Адам баласының жүрегінде қадір тұтып, құрметтейтін екі ұғым болса, соның бірі - Ұстаз. Ұстаз да диқаншы секілді, әрбір адам жанына білім дәнін сеуіп, әр шәкіртін аялап, өмір атты шексіз ғаламға қанатын қомдап, қатайтып ұшырады. Әр шәкіртіне аянбай, бойындағы асыл қасиеттерін  үйретуден жалықпайтын ұстаздардың ұстазы - мектебіміздің  алғашқы әскери және технологиялық дайындық пәнінің мұғалімі, майор Онғаров Ералы Ізбасарұлын зейнетке шығу құрметіне арналған мектебімізде «Шәкірттердің сезінумен арманын, 40 жылды ұстаздыққа арнадың» атты ұстазды ұлықтау мерекелік шарасы өтті.

     Мерекелік шараны мектеп директоры Парманкулов Қанат Райымбекұлы құттықтау сөзімен бастап, Ералы Ізбасарұлының  шәкірттерге  тәлім-тәрбие,  жақсы қасиеттерді бойына дарытып, адамгершілік рухта бағыт-бағдар берудегі ұстаздық еңбегін, өнегелі, өмір тәжірибесін атап өтті.

     Ұлағатты ұстаз Ералы Ізбасарұлының шәкірттері қазіргі уақытта әр түрлі саланың білікті  мамандары. Шәкірті аудандық маслихат төрағасы Айтбай Жандарбеков арнайы ұстазына деген ыстық ықыласын білдірсе, ауыл әкімі Әбжапбаров Дәулет Сейтқалиұлы құттықтау сөзімен ұластырды. Лайықты ұстаз атану-мәртебе,  ал үміт артқан шәкірт болу- мерей. Сол себепті мәртебесі артқан ұлағатты ұстаздың мерейі үстем. Ұстаз бақыты - шәкірт құрметі. Мерекелік шараға ұстаздар, түлектер, отбасы мүшелері мен ауданның   алғашқы әскери және технологиялық дайындық пәнінің мұғалімдері қатысты.

   Ұстаз туралы  ой толғау мерекелік шарада әдеби-сазды монтажына жалғасты. 

  Ералы Ізбасарұлы 40 жылдық ұстаздық жолында жас ұрпаққа білім мен тәрбие берудегі қажырлы еңбегі, шығармашылық ізденісі және белсенді қызметі үшін Шиелі аудандық білім бөлімінің,  Шиелі ауданының қорғаныс істер бөлімінің, облыстық кәсіподақ комитетінің құрмет грамотасымен, Қызылорда облысы білім басқармасының,  Қызылорда облысының қорғаныс істері департаментінің құрмет грамотасымен марапатталған. Ералы Ізбасарұлы ұстаз ғана емес, қоғамдық жұмыстарда да белсенді. Қазақстан Республикасы Парламенті Мәжілісі мен мәслихаттары депуттарының кезекті сайлауының төрағасы. 

    Ұстаздық саланы абыроймен алып жүрген бүгінгі зейнеткер еңбегін мектеп мақтан тұтады.  

   Мерекелік шара соңында Ералы Ізбасарұлы ұжымы мен барша қонақтарға алғысын білдірді. 

  Мерейлі мерекеңіз құтты болсын, ардақты ұстаз!