🔰🔰Құмарлыққа бой алдыру - тәуелділік құрдымы 🔰🔰

"251 М.Әуезов атындағы орта мектебі “ коммуналдық мемлекеттік мекемесінде  "Ата-аналарды педагогикалық қолдау орталығының” жұмыс жоспары аясында 10 - 11 сынып ата-аналарының қатысуымен “Құмарлыққа бой алдыру - тәуелділік құрдымы” тақырыбында тренинг өткізілді. 

Ата-аналардың өз баласының қауіпсіздігін қамтамасыз ету қабілетін қалыптастыру, тәуелділік мінез-құлық қаупінің алдын алу жолдарын дамыту мақсатында ұйымдастырылған шара барысында жоғары сынып оқушыларының дамуындағы тәуекел аймақтары, тәуелділік түрлері (тамақ, алкоголь, есірткі, химия, вейпинг, құмар ойындар және т.б.) және белгілері, салдары, алдын алу шаралары бойынша ата-аналар интербелсенді әдістер  арқылы жұмыс жасай отырып, өз ой-пікірлерімен, тұжырымдарымен бөлісті. 

Сонымен қатар, жоғары сынып оқушыларының “қауіпті аймаққа” түсу себептеріне тоқталып, “Тұлға бейнесі” профилактикалық жаттығуы арқылы баланың дұрыс қалыптасуы мен дамуында отбасы мен ата-ананың, ұстаздарының қолдауы, қанаттандырып, ынталандыруы маңызды екені түсіндірілді.

Шара соңында “Егер бала жігерленсе, ол өзіне сенуді үйренеді”, “Бала шыншыл болып өссе, әділеттілікке үйренеді”, “Балаға қолдау көрсетілсе, ол өзін бағалауды үйренеді”, “Егер бала үнемі сынға ұшыраса, ол жек көруді үйренеді” сынды пікірлер арқылы баланың жарқын болашағы “өз қолымызда” деген қорытындыға келді.

Ұйымдастырушы: Мектеп әлеуметтік педагогі Зарқұмова Айгерім